DIPOLOG CITY — Daghang kabataan ug residente sa Barangay Estaka ang nakabenepisyo sa “Operasyong Kalusugan: Libreng Tuli at Konsulta 2026” nga malampusong gipahigayon sa Estaka Barangay Hall niadtong Mayo 18, 2026.
Lakip sa mga serbisyong gihatud atol sa kalihokan mao ang libreng tuli, medical consultation pinaagi sa YAKAP Program, profiling ug registration services, ingon man PhilHealth registration aron mas mapalapdan ang access sa mga benepisyo sa panglawas.
Gipangulohan ang maong inisyatiba sa Barangay Estaka ubos ni Punong Barangay Irvin A. Banga uban sa koordinasyon sa DOH Nurse Deployment Program pinaagi ni Nurse Angelica May Olivar ug suporta sa mga health workers gikan sa DOH-HRH Dipolog ug Estaka South Health Center.
Miduyog usab ang LGU Dipolog pinaagi sa City Health Office ubos sa liderato ni Mayor Roberto “Berto” Y. Uy, samtang naghatag usab og libreng tambal ug medical assistance ang Provincial Government of Zamboanga del Norte pinaagi sa Provincial Health Office ubos ni Gov. Darel Dexter T. Uy.
Pinaagi sa hiniusang paningkamot sa barangay, siyudad, ug probinsya, padayon nga gidala ang libre ug dekalidad nga serbisyong panglawas ngadto sa mga komunidad nga nanginahanglan.(JENIFFER JR. DELICA)
Source: Zamboanga del Norte Provincial News Network