Nagdala og libreng serbisyo medikal ug ayuda ang “Kuyog Ta” Medikal ug Serbisyo Caravan sa Barangay New Bataan, La Libertad niadtong Mayo 8 ubos sa pagpanguna ni Mayor Ricky Cuenca uban sa suporta sa Provincial Government sa Zamboanga del Norte pinaagi ni Governor Darel Dexter T. Uy.
Nakabenepisyo sa maong caravan ang 153 ka residente pinaagi sa libreng medical consultation, samtang 49 usab ang nakadawat og dental services ug duha ka kabataan ang natulian nga walay bayad. Naghatag usab og relief clothing ang Provincial Social Welfare and Development Office, samtang nagpangbakuna ug namaligya og bitamina alang sa mga hayop ang Provincial Veterinarian’s Office. Nag-apod-apod usab og seedlings ang Department of Agriculture ngadto sa mga residente.
Dako usab nga tabang sa mga pamilya ang implementasyon sa “Benteng Bigas” program diin nakapalit og bugas sa mas ubos nga presyo ang mga lumolopyo ilabina karon nga nisaka ang presyo sa mga palaliton.
Gipahigayon usab sa maong kalihokan ang ICCs/IPs General Assembly alang sa pagpili sa Indigenous Peoples Mandatory Representative o IPMR sa barangay. Napiling bag-ong representante si Pablita G. Aleta, usa ka lider Subanen, nga motingog alang sa interes sa Indigenous Peoples sulod sa Barangay Council.(JENIFFER JR. DELICA)
Source: Zamboanga del Norte Provincial News Network