Malampusong napahigayon ang libreng operasyon alang na sa mga pasyenteng kabataan nga nagkinahanglan ug operasyon kadtong adunay kondisyon sa Imperforated Anus,(pasabot walay kaagian sa hugaw sa atong lawas sa may sampot) ingon man sa ubang sakit sama sa Hernia,Tumor,ug lain pang kaso sa sakit sa dakbayan niadtong Sabado, Nobyembre 16, 2024.
Ang nahisgutang libreng pagpang-opera gipahigayon mismo sa Corazon C. Aquino Hospital nga gipanguluhan sa mga bagtikan nga doktor nila ni Dr. Noel Astrologo (Pediatric Surgeon), Dr. Marloune Ambuang (Pediatric Anesthesiologist) ug mga kauban diin tinguha sa maong grupo nga makatabang alang na sa mga biktima sa nasangpit nga mga klase sa sakit.
Kahibaloan nga adunay daghang pasyenteng mga bata nga dul-an 21 niini ang malampusong naoperahan.
Matud pa ni Ms. Herdina Gallegos, Medical Staff sa CCAH, nga 21 ka mga pasyente, nga naka avail sa operasyon ang makapauli dayun sa ilang mga panimalay, ug ang laing pang18 kanila. Pero ang 3 niini nga parehong adunay kaso sa sakit nga Imperforated Anus ang wala pa tuguti nga makapauli ug hangtud karon ang anaa pa sa tambalanan para padayun pang mamonitor ang kondisyon niini.
Atol sa gipahigayon nga pag interview sa mga tigbalita sa mga inahan ngadto sa tulo ka bata,gikalipay kini kanila ug mapasalamaton kaayo sila ug daku sa kagamhanang lokal sa Dipolog City nga gihatagan ug kasolbaran ug katumanan ang problema sa kondisyon sa ilang mga anak,diin anaa pa karon ang mga bata nga nagpaalim pa sa ospital. Ang maong pag pang opera nakatabang usab sa mga kasikbit nga mga lugar ingon man sa tibuok probinsya sa Zamboanga del Norte.
Apil sa gipasalamatan sa mga ginikanan sila si kanhi Gov. Roberto Y. Uy ug Mayor Darel Uy, tungod sila ang hinungdan nga malampusong nahidangat dinhi kining maong kalihokan,ug sa ilang pakigbisog nga mapahigayon gayud dinhi sa dakbayan, nga halos daghanan pang nahatagan ug tabang medikal, uban kanila ni Dr. Noel Astrologo ug mga kauban, kinsa nagmalumpuson gayud nga napahigayon ang operasyon sa mga nagkinahanglan nga pasyente para sa hinanaling kaayuhan.
Ang maong libreng opera dinha sa Corazon C. Aquino Hospital,adunay tinguha nga mahitabo kining kalihokan matag bulan dinhi mismo sa dakbayan Dipolog sa Corazon C.Aquino Hospital, aron mahatagan gayud ug pagtagad ang mga pasyente nga dili na kinahanglan pang maka gasto sa pribado nga doctor ug pribado nga hospital diin kasagaran anaa pa sa Cebu o sa Dumaguete tumong ug tinguha sa kagamhanang lokal nga maka-alagad kini sa atong mga kaigsoonan nga adunay gipanghambin sa maong mga matang sa sakit.(Angelica T. Obina)
Source: DIPOLOG CITY GOVERNMENT