Nakabsan sa kinabuhi ang usa ka lalaki human kini gipusil samtang naglakaw pasulod sa usa ka gamay’ng skinita sa Barangay Kinasang-an, Dakbayan sa Sugbo, pasado alas 6:00 kagahapon sa Hapon, Nobyembre 20, 2024.
Ang biktima nga nailhan nga si Jakyl Rosaceña, 29-anyos, residente sa Sitio Santo Niño, Barangay Mambaling, natumbok nga naglakaw sulod sa maong skinita dihang siya kalit nga gipusil sa usa ka lalaking nakajacket ug itom, nagsul-ob ug facemask, ug nagmaong short.
Sumala sa imbestigasyon sa Inayawan Police Station 7, nakadawat sila ug tawag sa mga alas 6:40 sa gabii nga nagpahibalo bahin sa insidente. Sa ilang pagresponde, ilang naabtan si Rosaceña nga nagbuy-od diha sa lugar, patay na human maigo sa luyo nga bahin sa iyang lawas.
Narekober usab sa crime scene ang usa ka kabhang sa bala nga gituohang gikan sa kalibre .45 nga armas nga gigamit sa krimen. Matud sa mga saksi, ang suspek dali nga misibat palayo sakay sa usa ka E-bike padulong sa habagatang bahin human sa pagpamusil.
Padayon karon ang hot pursuit operation sa kapulisan aron ma-ila ug madakpan ang suspetsado. Gitutokan usab ang tanang anggulo sa kaso aron masuta ang motibo sa krimen.
I via Renante Socia Lada