Patay ang usa ka marine reservist human kini gipusil sa iyang nakalalis samtang nag-inom sa usa ka 24-hour convenience store sa Barangay Poblacion East, Moalboal, Cebu, mga alas 3:00 sa kaadlawon, Nobyembre 21, 2024.
Ang biktima mao si Bryan Puquera Sugay, hingkod ang edad ug residente sa maong dapit. Samtang ang suspek nailhan nga si Michael John Rusiana Surda, 20-anyos, ulitawo, ug lumulupyo sa Barangay Tunga, Moalboal.
Base sa imbestigasyon sa Moalboal Police Station, nag-inom ang biktima uban sa iyang mga barkada sa maong convenience store dihang niabot kini sa panaglalis sa suspek nga nag-inom usab sa pikas lamesa. Tungod sa kainit sa ilang argumento, milanit ang suspek sa iyang gitagoang armas ug gipusil ang biktima.
Daling gidala ang biktima sa Badian District Hospital apan gideklarar nga Dead on Arrival.
Sa paspas nga hot pursuit operation sa kapulisan, nadakpan ang suspek ug narekober gikan kaniya ang usa ka .38 revolver nga gigamit sa krimen.
Padayon karon ang imbestigasyon aron pagsuta sa motibo sa maong krimin.
I via Renante Socia Lada