Magpahigayon ang Office of the Provincial Governor ubos sa liderato ni Gov. Darel Uy ang libreng Neuro ug Spine Check-Up aron matabangan ang mga Zanortehanon nga adunay problema sa utok, li-og, likod ug dugokan. Ang maong libreng konsultasyon ipahigayon karong Mayo 13, 2026 alas 8:00 sa buntag didto sa Out-Patient Department sa ZaNorte Medical Center sa Brgy. Sicayab, Dipolog City.
Ang kalihokan gihimo pinaagi sa panagtambayayong sa One Stop Assistance Center o OSAC, ZaNorte Medical Center ug ZNMC Medical Team uban sa Neuro and Spine Surgeon nga si Dr. Alain Salloman. Tumong niini nga mapaduol sa katawhan ang espesyal nga serbisyong medikal ilabina sa mga pasyenteng lisod maka-access og specialist doctor.
Gidasig ang mga pasyente nga adunay padayon nga sakit sa ulo, li-og ug likod, scoliosis, pamamanhid sa kamot o tiil, kahuyang sa lawas, slip disc ug uban pang sakit nga may kalabotan sa utok ug spine nga magpacheck-up sa maong aktibidad aron masayong matambalan ang ilang kahimtang.
Sumala sa probinsyal nga pangagamhanan, kabahin kini sa padayon nga paningkamot ni Gov. Darel Uy sa paghatag og mas duol, paspas ug dekalidad nga serbisyong panglawas alang sa katawhan sa Zamboanga del Norte.(JENIFFER JR. DELICA)
Source: Zamboanga del Norte Medical Team