Gipahigayon sa Zamboanga del Norte Civil Registrars Association o ZANOCRA uban sa Philippine Statistics Authority-Zamboanga del Norte ang usa ka training workshop alang sa mga solemnizing officers, church secretaries ug Municipal Civil Registrars aron mapalambo ang ilang kahibalo sa hustong pagproseso sa marriage documents ug malikayan ang mga sayop sa Certificate of Marriage. Ang kalihokan gipahigayon didto sa Municipal Gymnasium sa Sergio Osmeña Sr., Zamboanga del Norte.
Kapin sa usa ka gatos ka partisipante gikan sa nagkalain-laing lungsod sa probinsya ang mitambong sa maong pagbansay, lakip na ang mga pari, pastor, church secretaries ug mga representante gikan sa Muslim ug Subanen communities. Gihisgutan sa workshop ang Administrative Order No. 1 Series of 2021 ug ang paggamit sa PhilCRIS system aron mas mapaspas ug mas tukma ang civil registration process.
Gipasabot sa mga resource speakers gikan sa PSA ang tukmang proseso sa pagrehistro sa kasal, responsibilidad sa mga solemnizing officers ug ang importansya sa hapsay nga dokumentasyon aron malikayan ang problema sa legal nga papeles sa mga magtiayon. Naglakip usab ang kalihokan og hands-on training sa paggamit sa PhilCRIS system.
Samtang, gipadayag ni ZANOCRA President ug Siayan Municipal Civil Registrar Ruel B. Calapiz ang pagpasalamat sa mga mitambong ug sa suporta sa PSA sa maong aktibidad. Sumala usab sa PSA-Zamboanga del Norte, mas mapaspas pa ang pagproseso sa mga dokumento karong tuiga human makadawat og bag-ong printing machine ang ahensya.(JENIFFER JR. DELICA)
Source: Zamboanga del Norte Provincial News Network