Gidala sa Cebu ang usa ka bag-ong natawo nga bata gikan sa Polanco, Zamboanga del Norte aron matambalan human kini ma-diagnose og “imperforate anus” o kondisyon nga walay hustong agianan sa pagpagawas sa hugaw. Ang bata paspas nga gi-refer gikan sa Dr. Jose Rizal Memorial Hospital ngadto sa UCMed sa Mandaue City alang sa operasyon ug dugang tambal.
Giubanan sa biyahe sila Nurse Joel Rey Carcasona, amahan sa bata, ug ambulance driver nga si Reneboy It-it aron masiguro nga luwas ug maampingong maatiman ang pasyente atol sa taas nga byahe paingon sa Cebu. Bisan naa pay recovery ang inahan ug wala pa makagawas sa ospital, gipadayon gihapon ang pagdala sa bata tungod sa iyang kahimtang nga nagkinahanglan dayong espesyal nga pag-atiman.
Gipasalamatan sa pamilya ang ZNMC Medical Team sa dakong tabang ug pag-atiman nga ilang nadawat sugod sa referral hangtod sa operasyon sa bata. Ilang personal nga gibisita ang opisina sa medical team pagbalik nila sa probinsya aron ipadayag ang ilang pagpasalamat sa mga doktor, nurse ug mga personnel nga nitabang sa ilang anak.
Gidayeg usab ang suporta ni Gov. Darel Uy, Medical Team Head Herdina Gallegos, Hospital Administrator Dr. Esmeralda Nadela, ug surgeon nga si Dr. Noel Astrologo sa pagpasayon sa referral ug paghatag og kalidad nga serbisyong medikal alang sa mga pasyente sa Zamboanga del Norte.(JENIFFER JR. DELICA)
Source: Zamboanga del Norte Medical Team