Nakatabang sa kapin 120 ka pasyente ang libreng medical outreach nga gipahigayon sa Zamboanga del Norte Medical Center sa Brgy. Sicayab, Dipolog City, aron mapalapad ang access sa serbisyong panglawas sa probinsya.
Sa datos, 60 ka pasyente ang nakaangkon og konsultasyon, assessment ug espesyal nga mga pamaagi lakip ang 3 ka malampusong Arteriovenous Fistula procedures, 1 Internal Jugular insertion ug 1 Permanent Catheter insertion alang sa mga pasyenteng nagpa-dialysis.
Samtang, 61 ka pasyente usab ang natabangan sa OB-GYNE services pinaagi sa libre nga konsultasyon ug screening, diin usa ka Endometrial Biopsy ang malampusong nahimo atol sa kalihokan.
Gipahigayon ang maong serbisyo pinaagi sa panagtinabangay sa ZNMC Medical Team ubos ni Herdina Gallegos ug Dr. Esmeralda A. Nadela, kauban ang One Stop Assistance Center ug mga espesyalistang doktor, nga nagpakita sa padayon nga paningkamot sa probinsya ubos ni Gov. Darel Uy sa paghatag og duol ug dekalidad nga serbisyong panglawas.(JENIFFER JR. DELICA)
Source: Zamboanga del Norte Medical Center