Magpahigayon og libreng medical check-up ug konsultasyon ang Zamboanga del Norte Medical Center karong Marso 26 ug 29 sa Outpatient Department sa Sicayab sugod alas 8 sa buntag.
Sa Marso 26, manguna ang mga doktor sa paghatag og serbisyo alang sa mga pasyente nga adunay sakit sa kasingkasing ug baga, lakip na ang fistula creation alang sa mga nagpailalom sa dialysis aron mas mapalambo ang ilang access sa pagtambal.
Sa Marso 29, ipahigayon ang pediatric surgery check-up nga nagpunting sa early detection ug evaluation sa mga kondisyon sa mga bata nga mahimong magkinahanglan og operasyon, apil ang follow-up sa mga naoperahan na.
Giawhag ang publiko nga mosayo tungod sa limitadong slots matag adlaw ug magdala sa ilang medical records, samtang gipalig-on sa probinsya ang paghatag og libre ug accessible nga serbisyong panglawas.(JENIFFER JR. DELICA)
Source: Zamboanga del Norte Provincial News Network