Nagsugod na ang Kapitolyo sa Sugbo sa pagpahugot sa waste segregation o sakto nga pagbulag sa basura sa tanang opisina sa probinsya. Gimanduan ni Cebu Governor Pamela Baricuatro ang tanang department heads nga sundon kini aron mahimong pananglitan sa tibuok probinsya.
Butangan og lain-laing basurahan ang mga opisina—para sa basa (wet) ug uga (dry) nga basura—aron mas organisado ang paglabay ug pagdumala niini. Matud pa sa gobernador, kinahanglan magsugod sa Kapitolyo ang maong lakang aron masundan sa ubang lungsod ug siyudad.
Gisugyot usab sa Provincial Environment and Natural Resources Office nga gamiton ang usa ka yuta sa Sudlon, Lahug aron himuan og compost pits para sa biodegradable o malata nga basura.
Samtang, alang sa dili malata nga basura, plano sa probinsya ang pagpalit og usa ka waste-to-fuel machine nga nagkantidad og ₱10 milyon aron mahimo kining gasolina o enerhiya sa umaabot.
Human ipatuman sa Kapitolyo, palapdan usab kini nga programa sa ubang lugar sama sa Cebu North ug South Bus Terminals ug sa Larsian food park aron mas mapalambo ang pagdumala sa basura sa tibuok probinsya.
Source: Cebu Province PIO
I via Renante Socia LadaEWS MARCH 25,2026