Napulo ka pasyente nga adunay balatian sa kidney ang nakapahimulos sa libreng konsultasyon ug pagpataod sa arteriovenous o AV fistula sa Out-Patient Department sa Zamboanga del Norte Medical Center sa Dakbayan sa Dipolog isip kabahin sa padayon nga medical program sa Probinsyal nga Panggamhanan.
Gipahigayon ang serbisyo pinaagi sa Zamboanga del Norte Medical Team uban sa mga espesyalistang doktor gikan sa Dakbayan sa Cebu nga nagtanyag og konsultasyon ug operasyon alang sa mga pasyenteng nagkinahanglan og AV fistula isip preparasyon sa hemodialysis.
Lakip sa mga nakabenepisyo ang usa ka Person Deprived of Liberty ug ubang mga pasyente gikan sa nagkalain-laing lungsod sa probinsya. Sumala sa pipila kanila, dako ang natabang sa libreng serbisyo tungod kay mokabat og liboan ka piso ang gasto sa maong pamaagi kung ipahigayon sa pribadong tambalanan.
Ang AV fistula usa ka operasyon nga naghimo og permanenteng koneksyon tali sa artery ug vein aron mahimong lig-on nga agianan sa dugo alang sa mga pasyenteng adunay chronic kidney disease nga nagpailalom sa hemodialysis. Padayon usab ang medical program sa probinsya aron mas daghang Zanortehanon ang makadawat og espesyal nga serbisyong panglawas.(JENIFFER JR. DELICA)
Source: Zamboanga del Norte Provincial News Network