Gidawat sa mga kwalipikadong benepisyaryo sa Manukan ug Jose Dalman ang 20 ka kilo nga bugas alang sa bulan sa Hulyo ug Agosto ubos sa Local Government Support Fund-Financial Assistance to Local Government Units (LGSF-FALGU) Rice Distribution Project niadtong Agosto 4, 2026.
Lakip sa mga nakabenepisyo ang mga low-income families, solo parents, senior citizens, indigent families ug uban pang vulnerable sectors. Sa unang hugna sa distribusyon, 867 ka panimalay sa Manukan ug 705 ka benepisyaryo sa Jose Dalman ang nakadawat sa maong rice assistance.
Ubos sa programa sa Nasyonal nga Pangagamhanan, ang matag kwalipikadong benepisyaryo makadawat og 10 ka kilo nga bugas matag bulan sugod Hulyo hangtod Disyembre aron makatabang sa pagkunhod sa gasto sa pagkaon ug sa uban pang batakang panginahanglan.
Matud ni Manukan Municipal Councilor Mariane E. Alia, ang pondo sa programa nagagikan sa Nasyonal nga Pangagamhanan pinaagi sa LGSF-FALGU aron masiguro nga makaabot ang ayuda sa mga kwalipikadong pamilya.
Nagpasalamat usab ang pipila ka mga benepisyaryo, lakip si Shirly V. Salazar sa Manukan ug Lysie V. Gutib sa Jose Dalman, nga miingon nga dako ang ikatabang sa bugas sa adlaw-adlaw nga panginahanglan sa ilang mga pamilya.
Ang maong distribusyon kabahin sa unang hugna sa implementasyon sa programa nga magpadayon pa sa ubang mga lungsod ug siyudad sa Zamboanga del Norte pinaagi sa Provincial Social Welfare and Development Office (PSWDO) ug sa mga City ug Municipal Social Welfare and Development Offices.(IKEN B. GULLEM)
Source: Zamboanga del Norte Provincial News Network