Gipanalanginan sa Dakbayan sa Dipolog ang bag-ong fire truck nga ibutang sa City Disaster Risk Reduction and Management Office aron mapalig-on pa ang kahandam ug pagtubag sa mga emerhensiya ilabina panahon sa sunog.
Gipahigayon ang blessing ceremony sa Museo Dipolog Grounds diin mitambong si Mayor Roberto Y. Uy, mga opisyal ug kawani sa dakbayan, samtang gipangunahan ni Pastor Gil C. Buagas ang pagpangamuyo alang sa maong sakyanan.
Ang fire truck adunay kapasidad nga 15,000 ka litro sa tubig ug magsilbing dugang nga firefighting unit aron mapadali ang pagresponde sa mga insidente sa sunog ug uban pang emerhensiya sa siyudad.
Sumala sa Lokal nga Panggamhanan sa Dipolog, kabahin kini sa padayon nilang paningkamot sa pagpalig-on sa disaster preparedness ug paghatag og mas episyenteng serbisyo aron masiguro ang kaluwasan sa mga residente.(JENIFFER JR. DELICA)
Source: Dipolog City Government