Nagkadaiyang mga proyekto nga nagkantidad og kapin ₱62 milyon ang pormal nga giturn-over sa Barangay Moliton, Roxas aron mapalig-on ang sektor sa edukasyon, transportasyon ug suplay sa tubig sa komunidad.
Gipangunahan ni Second District Representative Irene “Ate Ai” Labadlabad ang turnover sa mga proyekto nga nahuman sa panahon ni kanhi Second District Representative ug karon Roxas Mayor Glona Labadlabad.
Lakip sa mga giturn-over ang ₱1.5 milyong water system, ₱2.5 milyong road concreting project, usa ka one-storey nga upat ka classroom school building nga nagkantidad og ₱4.2 milyon.
Aduna usab usa ka one-storey nga duha ka classroom school building nga nagkantidad og ₱2.4 milyon, usa ka Tech-Vocational Workshop Building nga nagkantidad og ₱9.9 milyon, duha ka three-storey school buildings nga adunay unom ka classroom matag usa nga nagkantidad og ₱31.8 milyon, ug usa ka two-storey school building nga adunay upat ka classroom nga nagkantidad og ₱10 milyon.
Sumala kang Congw. Labadlabad, ang maong mga imprastraktura gilauman nga makapauswag sa kalidad sa edukasyon, makapalig-on sa batakang serbisyo, ug makahatag og dugang kalamboan sa mga komunidad sa Ikaduhang Distrito sa Zamboanga del Norte.
Gipahibalo usab niya nga adunay dugang pang mga proyekto nga ipatuman sa Ikaduhang Distrito sa tuig 2027.(IKEN B. GULLEM)
Source: Zanorte News Flash