Giila sa Parole and Probation Administration (PPA) Region IX ang paningkamot sa Dipolog City sa pagsuporta sa community-based rehabilitation pinaagi sa Heroes for Change Award nga gipresentar ngadto kang City Mayor Roberto Y. Uy niadtong Agosto 7, 2026.
Gipresentar ang maong award atol sa courtesy visit sa mga opisyal sa PPA Region IX sa City Mayor’s Office, isip pag-ila sa kontribusyon sa siyudad sa mga programa nga nagtabang sa rehabilitation ug reintegration sa mga persons under probation, parole ug uban pang beneficiaries sa community-based interventions.
Gipangulohan ang delegasyon ni Regional Officer-in-Charge Amites B. Butiong sa PPA Region IX ug Chief Probation and Parole Officer Ma. Jeanette F. Requina sa Dipolog City Parole and Probation Office.
Kauban usab nila si Ustadz Niel E. Bael sa PPA, City Social Welfare and Development Officer Patrick S. Jalapadan, City Agriculturist Engr. Kerr N. Porlas, ug Barangay Barra Punong Barangay Moman P. Apura.
Ang recognition gihatag ngadto sa Orchids City VPA Association isip pag-ila sa ilang exemplary voluntary service ug dakong kontribusyon sa community-based rehabilitation.
Gikilala usab pinaagi sa award ang papel sa mga boluntaryo ug community partners sa pagtabang sa mga benepisyaryo sa parole ug probation nga makabalik ug makapahiangay pag-usab sa ilang komunidad.
Pormal nga gihatag ang maong recognition niadtong Hulyo 30, 2026, sa Quezon City, ug gipresentar ngadto sa lokal nga pangagamhanan atol sa pagbisita sa PPA Region IX.
Gipakita sa maong pag-ila ang importansya sa pakigtambayayong tali sa lokal nga pangagamhanan, PPA ug mga community volunteers sa pagtukod og mas suportadong palibot alang sa rehabilitation ug pagbalik sa mga benepisyaryo ngadto sa produktibong kinabuhi sa komunidad.(IKEN B. GULLEM)
Source: Dipolog City Government