Pormal nga midonar og usa ka parsela sa yuta ang Local Government Unit of Gutalac ngadto sa Gutalac National High School human mapirmahan ang Deed of Donation sa usa ka seremonya nga nagpalig-on sa suporta sa lokal nga panggamhanan alang sa sektor sa edukasyon sa Gutalac, Zamboanga del Norte.
Gipirmahan ang kasabutan tali ni Mayor Eddie Justin T. Quimbo, ug ni Rezve Sael, principal sa maong eskwelahan, nga nagtimaan sa opisyal nga pagbalhin sa yuta ngadto sa institusyon aron magamit sa pagpalambo sa pasilidad sa eskwelahan.
Ang maong donasyon kabahin sa padayon nga paningkamot sa LGU sa pagpalig-on sa edukasyon pinaagi sa paghatag og dugang nga lugar alang sa mga proyekto ug imprastraktura nga makatabang sa pagkat-on sa mga estudyante.
Gilauman nga ang maong lakang makahatag og mas maayong kahimtang sa pag-eskwela ug makasuporta sa dugang nga mga programa sa eskwelahan alang sa kabatan-onan sa komunidad.(IKEN B. GULLEM)
Source: LGU GUTALAC-PUBLIC INFORMATION