Gisugdan na sa City Government of Dapitan ang katapusang hugna sa pagpangandam alang sa ika-63 nga Charter Day Celebration pinaagi sa usa ka coordination meeting nga gipangunahan ni OIC-City Administrator Danilo S. Areños Jr. niadtong Hunyo 8 sa Government Center Amphitheater.
Atol sa tigom, gipresentar ang pinal nga kalendaryo sa mga kalihokan nga pagahimoon sulod sa usa ka semana, gikan Hunyo 15 hangtod 22. Girepaso usab sa mga opisyal ug mga komite ang kahimtang sa preparasyon, lakip ang seguridad, trapiko, venue management, ug ubang logistical requirements.
Gitambongan ang maong miting sa mga department heads, committee chairpersons, event organizers, ug mga stakeholder nga adunay papel sa pagpatuman sa mga kalihokan sa kasaulogan.
Pinaagi sa hiniusang koordinasyon ug maampingong pagplano, gilauman sa dakbayan ang usa ka malinawon, organisado, ug malampusong Charter Day Celebration nga magpasundayag sa kasaysayan, kalampusan, ug padayong kalamboan sa Dakbayan sa Dapitan.(IKEN B. GULLEM)
Source: Dapitan City Government