Nagdugang og kapasidad sa pagresponde sa mga emerhensya ang Municipal Government of Gutalac pinaagi sa pag-angkon sa bag-ong rescue vehicle nga opisyal nga gibendisyonan ubos sa administrasyon ni Mayor Eddie Justin Quimbo.
Ang maong sakyanan, nga gipondohan gikan sa 5% MDRRM Fund alang sa 2026, gilauman nga makatabang sa mas paspas nga paghatod sa rescue operations, medical response, ug uban pang serbisyo panahon sa kalamidad ug emerhensya.
Matud sa lokal nga panggamhanan, ang pagpalit sa rescue vehicle kabahin sa ilang padayon nga programa aron mapalig-on ang disaster preparedness ug masiguro nga adunay igo nga kagamitan ang munisipyo sa pag-atubang sa nagkadaiyang mga sitwasyon nga nagkinahanglan og dali nga responde.
Pinasgi sa maong dugang nga kagamitan, mas mapanalipdan ang kinabuhi ug kabtangan sa mga residente samtang nagpadayon ang Gutalac sa pagtukod og mas luwas ug mas andam nga komunidad.(IKEN B. GULLEM)
Source: LGU Gutalac-Public Information