Nagpagawas og public advisory ang Gobyerno sa Siyudad sa Dapitan City aron ipahibalo sa publiko ang proposed Schedule of Market Values (SMV) alang sa tanang real property units sulod sa taxing jurisdiction sa siyudad isip pagpangandam sa 2027 General Revision of Property Assessments.
Kini gihimo subay sa Section 15 sa Republic Act No. 12001 o ang Real Property Valuation and Assessment Reform Act (RVARA) ug sa ipatuman nga Implementing Rules and Regulations niini.
Kahinumdoman nga gisugdan na og public viewing sa proposed Schedule of Market Values sukad niadtong Marso 10, 2026, aron mahatagan og higayon ang mga residente ug stakeholders sa pagrepaso sa giandam nga valuation sa mga yuta ug uban pang real properties sa siyudad.
Sumala sa city government, kabahin kini sa ilang paningkamot sa pagpalig-on sa transparency, public awareness, ug stakeholder participation sa proseso sa property valuation.
Giawhag usab sa city government ang tanang residente ug property owners nga repasohon ang proposed SMV ug magpabiling updated sa mga lakang sa siyudad alang sa umaabot nga general revision sa property assessments sa 2027.(IKEN B. GULLEM)
Source: City Government of Dapitan