DIPOLOG CITY — Nagtigom ang mga residente gikan sa nagkadaiyang barangay sa siyudad alang sa implementasyon sa Walang Gutom Food Stamp Program nga gipangunahan sa Department of Social Welfare and Development (DSWD) niadtong Marso 31, 2026.
Gipahigayon ang kalihokan sa Zamboanga del Norte National High School–Turno Campus, diin nakabenepisyo ang mga lumulupyo gikan sa Barangay Cogon, Diwan, Sangkol, San Jose, ug Sinaman, uban sa kooperasyon sa City Government pinaagi sa City Social Welfare and Development Office.
Pinaagi sa maong programa, gihatagan og food assistance ang mga napiling benepisyaryo aron masiguro ang ilang access sa batakang panginahanglanon, ilabi na sa pagkaon, samtang gipalig-on ang kampanya batok sa kagutom sa komunidad.
Sumala sa mga tigpatuman, ang inisyatiba kabahin sa padayon nga paningkamot sa gobyerno sa pagpalambo sa food security ug pagtabang sa mga pamilyang nanginahanglan sa lain-laing barangay sa Dipolog City.(JENIFFER JR. DELICA)
Source: Dipolog City Government