Opisyal nga gilunsad sa Barangay Batayan ang Enhanced Gasang Bahandianon sa Umahan (EGBU) Scale Up Program nga nagtumong sa pagpalig-on sa sektor sa agrikultura sa ikatulong Distrito.
Nakabenepisyo sa maong programa ang 27 ka farmers associations gikan sa Kalawit ug kasikbit nga mga lungsod, diin nakadawat sila og farm inputs ug makinarya. Apan labaw pa niini, gihatagan usab sila og komprehensibong suporta nga naglakip sa produksyon, marketing, pagpalambo sa organisasyon, ug financial management.
Sumala sa mga opisyales, ang programa usa ka pinalapad ug gi-upgrade nga bersyon sa naunang inisyatiba aron masiguro ang kalungtaran ug mas dako nga epekto sa panginabuhi sa mga mag-uuma.
Samtang, ang paglunsad sa 3rd District maoy unang hugna sa mas halapad nga implementasyon, uban sa giplanong rollout sa 1st ug 2nd District aron mas daghan pang benepisyaryo ang maabot.
Gilauman nga pinaagi sa EGBU Scale Up Program, mas mapalig-on ang kapasidad sa mga mag-uuma ug mas mapadali ang ilang pag-abot sa merkado, nga mosangpot sa mas lig-on ug malungtarong kauswagan sa agrikultura sa probinsya.(IKEN B. GULLEM)
Source: Gov Darel Uy