Nanguna ang mga babayeng kapulisan sa Dapitan City Police Station (CPS) sa pagpahigayon og checkpoint operation kaniadtong Marson 27, sa National Highway sa Barangay Polo, isip kabahin sa pagpalig-on sa seguridad ug pagpatuman sa balaod sa trapiko.
Sa pagpanguna ni PLTCOL Eva Joy E. Capurcos, gipahigayon ang operasyon uban sa Zamboanga del Norts Police Provincial Office (ZNPPO) Provincial Headquarters ug 1st Provincial Mobile Force Company, diin gipunting ang pagmonitor sa mga sakyanan ug pagpugong sa posibleng kalapasan ug kriminalidad.
Gawas sa pagmintinar sa kalinaw ug kahapsay, gipakita usab sa kalihokan ang abilidad ug liderato sa mga babayeng pulis sa frontline operations, nga nagpalig-on sa kampanya alang sa gender equality ug women empowerment sulod sa police service.
Gipahinumduman usab ang mga motorista nga magdala kanunay og kumpletong dokumento ug motuman sa mga lagda sa trapiko aron malikayan ang disgrasya ug mapadayon ang kaluwasan sa kadalanan.(IKEN B. GULLEM)
Source: Zamboanga del Norte Police Provincial Office