Gitabangan og dala sa ospital ang usa ka lalaki human gikaingong na-seizure sa Brgy. San Francisco, Liloy, Zamboanga del Norte niadtong alas 12:20 sa udto, Hunyo 29, 2026.
Pag-abot sa Shift A EMS Duty Personnel sa Liloy Municipal Fire Station, ilang nakita ang pasyente nga naglingkod sa higdaanan ug adunay panimuot apan dili makatubag. Sumala sa iyang mga kapamilya, nakaagi kini og seizure sa wala pa miabot ang mga responder.
Atol sa assessment, namatikdan usab sa EMS personnel ang right-sided hemiplegia o pagkaluya sa tuo nga bahin sa lawas sa pasyente. Gikuhaan dayon kini og vital signs ug maampingong gipahiluna sa long spine board aron maandam sa transportasyon.
Gidala ang pasyente sakay sa BFP ambulance ngadto sa Liloy Integrated Health District Hospital alang sa dugang medikal nga ebalwasyon ug pagtambal. Padayon usab ang pagmonitor sa iyang kahimtang hangtod nga natugyan siya sa mga medical personnel sa ospital.(JENIFFER JR. DELICA)
Source: BFP R9 Liloy Fire Station