Gibaligya sa public auction sa Bureau of Fire Protection (BFP) Regional Office IX ang mga government vehicle nga gideklarang Beyond Economic Repair (BER) atol sa bidding nga gihimo niadtong Hunyo 29, 2026 sa ilang regional office.
Gipangulohan ang maong kalihokan ni FSSUPT Rommel E. Villafuerte, Assistant Regional Director for Administration. Gitambongan usab kini sa mga kwalipikadong indibidwal ug mga entidad nga miapil sa patas ug transparent nga bidding process subay sa balaod sa pag-dispose sa government property.
Tumong sa public auction ang husto nga pagbaligya sa mga government vehicle nga dili na magamit aron malikayan ang dugang gastohan sa gobyerno ug masiguro ang hapsay nga pagdumala sa mga assets.
Matud sa BFP-9, kabahin ang maong inisyatiba sa ilang padayon nga pagpalig-on sa transparency, accountability ug good governance, samtang gihatagan og patas nga oportunidad ang tanang kwalipikadong bidders nga miapil sa bidding.(JENIFFER JR. DELICA)
Source: Bureau of Fire Protection Region 9