Wala na maka iskapo sa kamot sa mga tinugyanan sa balaod homan masikop ang usa ka lalaki nga nag atubang sa kasong Direct Assault atol sa gihimo nga operasyon sa mga personahe sa kapulisan mga alas 12:00 sa udto,niadtong Hulyo 5, 2026,didto sa Blumentritt Street, Barangay Linabo, Dapitan City.
Ang maong dinakpan naila nga usa ka 37 anyos nga lalaking suspek kinsa gikataho nga nakalapas sa giingong Direct Assault upon a Person in Authority ug Resistance and Disobedience to a Person in Authority tungod sa nahitabong komosyon sa nasangpit nga Barangay nga gireport sa usa ka concerned citizen ngadto sa mga personahe sa Dapitan City Police Station (CPS) nga maoy nahimong hinungdan sa pagkasikop sa suspek.
Human sa report bahin sa kagubot sa lugar, ang mga personahe sa Dapitan CPS daling miresponde ug miadto sa lugar alang sa pagpahigayon og imbestigasyon.
Atol sa pagresponde, ang suspek, kinsa gikataho nga ubos sa impluwensya sa makahubog nga ilimnon, kalit nga miduol sa usa ka 36 anyos nga lalaking Barangay Tanod ug giingong gisagpa kini sa ulo nga walay hinungdan.
Tungod niini ang mga mirespondeng pulis dali nga midakop sa suspek ug gidala sa Dapitan CPS alang sa hustong dokumentasyon ug mga pamaagi sa pagkustodiya.
Ang dinakpan anaa karon sa kustodiya sa Dapitan City Police station samtang giandam ang angay nga mga reklamo ug karon gipaubos usab sa medical examination alang sa standard legal procedures.(MEDALYN U. BORJA)
Source: ZNPPO