Gipanghatag sa Community Environment and Natural Resources Office o CENRO Manukan ang 90 ka gi-renew nga Certificates of Stewardship Contract o CSC ngadto sa mga benepisyaryo sa Siayan isip kabahin sa pagsaulog sa ika-59 nga Araw ng Siayan ug Philippine Environment Month.
Gipahigayon usab sa CENRO Manukan ang One-Stop Shop DENR Permitting System sa Municipal Gymnasium aron mas mapaduol ang mga serbisyo sa Department of Environment and Natural Resources ngadto sa mga residente.
Sa 90 ka benepisyaryo, 75 ang gikan sa Barangay Diongan ug 15 gikan sa Barangay Mangilay. Ang pag-renew sa ilang CSC nagpalig-on sa ilang katungod ug responsibilidad sa pagpanalipod ug hapsay nga pagdumala sa mga yutang lasang nga ilang gigamhanan.
Sumala sa CENRO Manukan, ang maong inisyatiba kabahin sa padayon nilang paningkamot sa pagpalapad sa serbisyo sa gobyerno, pagpanalipod sa kalikupan ug pagsuporta sa malungtarong pagdumala sa kalasangan ug panginabuhi sa mga benepisyaryo.(JENIFFER JR. DELICA)
Source: DENR Zamboanga Peninsula