Tugpa sa prisohan ang usa ka Lalaking nasakmitan og gituohang Iligal nga Drogang Shabu ug gituohan usab nga pina-ugang dahon sa Marijuana, pinaagi sa gipahigayon nga Drug Buy-Bust Operation, didto sa Barangay Don Jose Aguirre, Lungsod sa Manukan, ning Probinsiya sa Zamboanga del Norte, niadtong nakalabay’ng adlaw Agusto 19, 2025, sa may alas 12:19 sa kaadlawon.
Giila sa Manukan Pnp ang dinakpan sa alyas nga Bangag, ana na sa hingkod ang pangidaron ug Lumolupyo sa Barangay Poblacion, Lungsod sa Salug, ning mao ra usab nga Probinsiya, diin posetibo kining nasakmitan og mokabat sa 3 ka naka Heat-Sealed Transparent Plastic Sachets, nga adunay sulod nga White Crystalline Granules, ug kini gituohang Shabu, nga gibana-bana ang gibug-aton niining mokabat ngadto sa 0.60 gramos, maingon man ang 3 ka gagmay’ng naka Ziplock Sachets, nga adunay sulod nga gituohang pinauga nga dahon sa Marijuana, nga mokabat ang gibug-aton niini ngadto sa 3.50 gramos, diin gibana-bana usab ang kinatibuk-ang kantidad sa mga nakumpiskang iligal nga drogas gikan sa suspetsadong mokabat ngadto sa Php4,500.00.
Gipadala gilayon ngadto sa Zamboanga del Norte Provincial Forensic Unit (ZNPFU) sa Dipolog City ang mga nakumpiskang Iligal nga Drogas gikan sa dinakpan, alang na sa ipahigayon nga eksaminasyon, samtang ang Suspetsado atua na ubos sa kustodiya sa Manukan Municipal Police Station alang na sa tukmang disposesyon.(Julius Esmade)