Gipahigayon sa City Government of Dipolog pinaagi sa City Social Welfare and Development Office o CSWDO ug Center for Children with Special Needs ang Lakbay-Sabay Program aron mahatagan og higayon ang mga batang may special needs nga makalaag, makakat-on, makaapil, ug makasinati og makahulugang mga kalihokan uban sa ilang mga ginikanan ug kauban.
Unang gibisitahan sa mga partisipante ang Dapitan City Hall diin mainiton silang gidawat ni Vice Mayor Hon. Gabriel M. Cad ug gihatagan og higayon nga makasulod sa Sangguniang Panlungsod Session Hall. Gipadayon dayon ang ilang pagbisita sa Punto de Desembarco de Rizal ug Rizal Shrine aron makakat-on bahin sa kasaysayan ug koneksyon sa Dapitan kang Dr. José Rizal, samtang napahimuslan usab nila ang lugar.
Sa hapon, miadto ang grupo sa Agriculture Office/Farm Site diin nakakat-on ang mga partisipante bahin sa agrikultura, kinaiyahan, ug mga kalihokan nga nakabase sa komunidad. Nagpadayag usab og pagpasalamat ang mga bata, ilang mga ginikanan, ug CCSN Dipolog staff kang Dapitan City Mayor Hon. Evenlyn T. Uy tungod sa mainitong pagdawat ug pagtabang sa ilang paglibot sa mga lugar ug historical sites sa siyudad.
Pinaagi sa Lakbay-Sabay Program, gipadayon sa City Government of Dipolog ang paghatag og inclusive opportunities alang sa mga batang may special needs pinaagi sa mga kasinatian nga makatabang sa ilang pagkat-on, pakig-uban, ug aktibong partisipasyon. Ang maong kalihokan naghatag usab kanila og higayon nga makadiskobre og bag-ong mga lugar ug makasinati og meaningful nga mga kalihokan uban sa ilang pamilya ug kauban.(JENIFFER JR. DELICA)
Source: Dipolog City Social Welfare and Development Office