Mainiton nga giabiabi ni Congresswoman Irene “Ate Ai” Labadlabad ang mga estudyanteng gikan sa Barangay Panampalay, Roxas, Zamboanga del Norte nga mibisita sa Dipolog City isip kabahin sa ilang Lakbay Aral educational tour.
Ang grupo gipangulohan ni Roxas First Lady ug Women’s Federation President Angelita L. Rengquijo. Sumala sa mga tigpasiugda, kini ang unang higayon nga nakabisita sa Dakbayan sa Dipolog ang maong mga estudyante.
Atol sa panagtagbo, nakig-istorya si Cong. Ate Ai sa mga estudyante ug namati sa ilang mga damgo ug pangandoy alang sa umaabot. Gidasig usab niya sila nga magpadayon sa pagpaningkamot aron makab-ot ang ilang mga tinguha pinaagi sa edukasyon.
Gipanghatagan usab ni Cong. Ate Ai ang matag estudyante og food packs ug bag-ong mga bag isip suporta sa ilang pag-eskwela ug pag-apil sa maong educational tour.
Matud pa sa opisina ni Cong. Labadlabad, ang maong inisyatiba kabahin sa padayon nga pagpalambo sa edukasyon ug paghatag og inspirasyon sa kabatan-onan pinaagi sa mga programa nga nagpalapad sa ilang kahibalo ug kasinatian.(IKEN B. GULLEM)
Source: Irene “Ate Ai” Labadlabad