Lakang padulong sa mas lig-on nga serbisyo sa tubig ang gisugdan sa Lokal nga Panggamhanan sa Sindangan pinaagi sa groundbreaking sa Sindangan Water System Drilling and Pumping Station niadtong Hunyo 14 sa Tigbao.
Gipangunahan ni Mayor Glona Labadlabad ang maong kalihokan nga nagtimaan sa pagsugod sa usa ka proyekto nga gilauman makatabang sa pagsulbad sa panginahanglan sa mas kasaligan ug malungtarong suplay sa tubig sa lungsod.
Sa dihang mahuman, ang pasilidad magsilbing dugang nga tinubdan ug suporta sa kasamtangang water distribution system aron mas daghang komunidad ang makabaton og access sa limpyo ug luwas nga tubig.
Gikonsiderar usab sa lokal nga panggamhanan ang proyekto isip usa sa mga prayoridad nga imprastraktura nga magpalambo sa kalidad sa batakang serbisyo ug mosuporta sa padayon nga kalamboan sa Sindangan.(IKEN B. GULLEM)
Source: Municipality of Sindangan