Gibuhian sa Dapitan City ang laing 85 ka Olive Ridley hatchlings sa baybayon sa Sunset Boulevard niadtong Marso 4, mga alas 4:00 sa hapon, nga gisaksihan sa mga residente ug estudyante. Ang kalihokan nagpunting sa padayon nga paningkamot sa siyudad sa pagpanalipod sa pawikan ug sa kahimsog sa kadagatan.
Gipangunahan ni Mayor Evelyn T. Uy ang pagbuhi kauban ang mga opisyales sa City Environment and Natural Resources Office, Philippine Coast Guard, ug mga barangay officials. Maampingong gibuhian ang gagmay’ng pawikan gikan sa sudlanan paingon sa baybayon hangtod nakaabot sa dagat.
Matud sa mayor, ikaduha na kini nga pagbuhi sulod sa duha ka adlaw, human usab gibuhian ang 70 ka hatchlings sa Barangay Tag-ulo kagahapon. Gipasiugda nga ang balik-balik nga pagpangitlog sa pawikan sa kabaybayonan maayong timailhan sa limpyo ug himsog nga kadagatan.
Nahisubay usab ang kalihokan sa pagsaulog sa World Wildlife Day ug nagdala og panawagan sa komunidad nga magtinabangay sa pagpanalipod sa baybayon ug pagreport sa ilegal nga pagpangayam aron masiguro ang padayon nga pagbalik sa mga pawikan sa Dapitan.(JENIFFER JR. DELICA)
Source: Zamboanga del Norte Provincial News Network