Nagpahigayon og Basic Occupational Safety and Health (BOSH) Safety Officer 1 Training ang Department of Labor and Employment (DOLE) Region 9 – Zamboanga del Norte Provincial Office niadtong buntag sa Marso 4, 2026 sa Museo Dipolog aron mapalig-on ang kahibalo sa mga tag-iya sa gagmay’ng negosyo bahin sa kaluwasan sa lugar-trabaho.
Gipangulohan ang kakihokan ni Chief Labor and Employment Officer Aileen B. Mondijar, nga nagtumong sa pagpalambo sa pagsunod sa labor laws ug occupational safety standards sa micro-establishments sa probinsya.
Atol sa training, gihisgutan ang batakang Occupational Safety and Health (OSH), lakip ang administrative requirements, responsibilidad sa employer, ug mga lakang aron malikayan ang aksidente ug peligro sa trabahoan. Gihatagan usab og giya ang mga partisipante kabahin sa husto nga pagpatuman sa mga balaod sa pagpanarbaho ug mga programa sa DOLE nga makatabang sa ilang mga negosyo.
Kini nga inisyatiba kabahin sa padayon nga paningkamot sa ahensya nga masiguro ang luwas, himsog, ug balaodnon nga palibot sa trabaho alang sa tanang mamumuo, ilabi na sa sektor sa gagmay’ng negosyo.
Gilauman nga pinaagi sa BOSH training, mas mapalig-on ang kultura sa kaluwasan sa mga establisemento sa Dipolog ug sa tibuok Zamboanga del Norte.(IKEN B. GULLEM)
Source: Dipolog City Government