Giawhag ni Labason Mayor Jelster Jed T. Quimbo ang mga indibiduwal nga nalambigit sa armadong kalihokan nga mobalik sa sabakan sa balaod ug sugdan ang malinawon nga kinabuhi uban sa ilang pamilya.
Gibuhat ni Mayor Quimbo ang maong panawagan human sa turnover sa duha ka former violent extremists (FVEs) ngadto sa kagamhanang probinsyal niadtong Mayo 7 sa Provincial Capitol dinhi sa siyudad.
“Hulat mi ninyo. Daghang programa sa gobyerno ang naghulat kaninyo,” matod sa mayor atol sa interview.
Sumala kaniya, bukas ang lokal nga kagamhanan sa pagdawat ug pagtabang sa mga mosurender pinaagi sa livelihood assistance ug reintegration programs aron makasugod sila og bag-ong kinabuhi.
Giingon usab ni Mayor Quimbo nga importante ang panaghiusa aron mapalig-on ang kalinaw ug kalamboan sa Labason ug sa tibuok Zamboanga del Norte.(IKEN B. GULLEM)
Source: Zamboanga del Norte Provincial News Network