Gipahigayon sa Labason Municipal Fire Station ang ilang unang Pickleball Tournament isip kabahin sa selebrasyon sa Bureau of Fire Protection (BFP) Anniversary.
Uban sa tema nga “Dink & Service: Dinking for a Cause,” ang torneyo gihimo sa Pqol Acers Court sa Labason, diin nagtapok ang mga personahe sa BFP ug mga miyembro sa komunidad alang sa usa ka mahigalaon apan kompetitibong dula.
Dili lamang kompetisyon ang maong kalihokan, kundili usa usab kini ka paagi aron mapalambo ang pisikal nga kahimsog, himsog nga estilo sa kinabuhi, teamwork, sportsmanship, ug panaghiusa tali sa BFP ug sa komunidad nga ilang giserbisyohan.
Pinaagi sa pickleball, gihatagan usab og higayon ang mga partisipante nga maglingaw, makigkompetensya, ug makig-uban sa usag usa samtang gisaulog ang anibersaryo sa BFP.
Sa kataposan sa torneyo, si FO3 Kenneth N. Gitalan ug FO1 Paul Mark S. Escuadro ang midaog isip mga kampeon human nagpakita og lig-on nga teamwork, abilidad, ug sportsmanship sa tibuok kompetisyon.
Ang kalampusan sa maong kalihokan nagpakita sa padayon nga paningkamot sa BFP sa pagpalig-on dili lamang sa serbisyo sa publiko, kondili usab sa kahimsog, panag-uban, ug relasyon niini uban sa komunidad.(IKEN B. GULLEM)
Source: BFP R9 Labason Fire Station