Gipasundayag sa Municipality of Salug ang iyang dato nga kultura, abunda nga agrikultura ug identidad isip Tri-People Town pinaagi sa exhibit booth niini sa Saulog 2026 sa Dipolog City Boulevard.
Gipasiugda sa booth ang temang “One Heart, One Soul,” nga naghulagway sa panaghiusa sa mga Kristiyano, Muslim ug Subanen nga nagpuyo sa lungsod. Gipakita usab dinhi ang nagkadaiyang lokal nga produkto nga bunga sa paningkamot sa mga mag-uuma ug residente sa Salug.
Makita usab sa mga bisita ang kasaysayan sa lungsod, impormasyon bahin sa mga tourist destination, ug mga tradisyon nga nagpakita sa talagsaong kultura sa mga Salugnon.
Gilauman sa lokal nga panggobyerno nga pinaagi sa exhibit, mas mailhan pa sa publiko ang potensyal sa Salug sa agrikultura, turismo ug kultura samtang gipakita ang garbo ug panaghiusa sa katawhan atol sa selebrasyon sa Saulog 2026.(JENIFFER JR. DELICA)
Source: Zamboanga del Norte Provincial News Network