DAVAO CITY — Gipakita sa Davao City Police Office (DCPO) ang ilang suporta sa sektor sa edukasyon pinaagi sa pag-apil sa Brigada Eskwela 2026 Kick-Off Program nga gipahigayon sa Maa Central Elementary School sa Barangay Maa, ning syudad.
Ang kalihokan gitambongan sa mga opisyal sa Department of Education (DepEd), mga lider sa barangay, stakeholders, volunteers, mga residente, ug mga representante sa lokal nga panggamhanan isip kabahin sa pagpangandam alang sa umaabot nga pagbukas sa klase.
Ubos sa temang “Bayanihan sa Paaralan: Nagkakaisa Para sa Kaayusan at Kaalaman,” gipasiugda sa programa ang kahinungdanon sa panaghiusa, boluntaryong serbisyo, ug kooperasyon sa nagkadaiyang sektor sa komunidad aron masiguro nga andam, limpyo, luwas, ug organisado ang mga eskwelahan alang sa mga estudyante.
Sa ilang mensahe, gihatagan ug gibug-aton sa DCPO nga ang edukasyon usa ka hiniusang responsibilidad nga nanginahanglan sa aktibong partisipasyon sa tanang sektor sa katilingban.(Camille Santos Naraga)(Source: Contributed)