Andam na ang tanan alang sa unang State of the Province Address o SOPA ni Governor Darel Dexter T. Uy nga pagahimoon alas-9 sa buntag karong adlawa sa Zamboanga del Norte Cultural and Sports Center.
Gikompleto na sa probinsyal nga panggobyerno ang mga pagpangandam sa venue, lakip ang pagbutang sa usa ka dako nga LED wall nga gamiton alang sa audio-visual presentation sa mga nahimo sa administrasyon ug sa mga programa nga giplano alang sa lalawigan.
Gipahimutang usab sa venue ang 27 ka bandila nga nagrepresentar sa 25 ka lungsod ug duha ka siyudad sa Zamboanga del Norte, isip simbolo sa panaghiusa ug hiniusang tinguha alang sa kalamboan.
Pinaagi sa SOPA, ihatag ni Governor Uy ang taho sa mga nahimo sa iyang administrasyon, ipresentar ang iyang panan-aw alang sa probinsya, ug ilatag ang mga prayoridad nga proyekto nga gitumong sa pagpauswag sa kinabuhi sa katawhan sa Zamboanga del Norte.(JENIFFER JR. DELICA)
Source: Zamboanga del Norte Provincial News Network