Gipahigayon sa Dakbayan sa Dapitan ang Bangus Dish Preparation ug Bangus Deboning Contests isip kabahin sa pagsaulog sa ika-63 Charter Day sa siyudad karong adlawa sa Government Center.
Gipakita sa mga partisipante ang ilang talento, kahanas ug pagkamamugnaon sa pagproseso ug pagluto sa bangus, samtang gipalambo usab ang kahibalo sa value-adding ug innovation sa sektor sa pangisdaan.
Lima ka contestants ang nag-indigay sa culinary category pinaagi sa pagpresentar sa nagkalain-laing putahe nga bangus, samtang unom usab ka partisipante ang nagpakitang-gilas sa paspas ug tukmang pagtangtang sa tunok sa bangus sa deboning contest.
Sumala sa City Agriculture Office, kabahin kini sa paningkamot sa lokal nga panggamhanan sa pagpalig-on sa panginabuhian sa mga mangingisda ug sa padayong pagpalambo sa sektor sa agrikultura ug pangisdaan sa Dakbayan sa Dapitan.(JENIFFER JR. DELICA)
Source: City Information Division- Dapitan