Pormal nang gisugdan sa lokal nga kagamhanan sa Dapitan ang Kinabayo Festival 2025 pinaagi sa Opening Ceremony ug Ribbon Cutting nga gipahigayon sa Ground Floor, Government Center ning dakbayan sa Dapitan, niadtong Hulyo 16, 2025.
Ang maong kalihokan,gipangulohan sa Mayor sa Dapitan nga si Mayor Evelyn T. Uy, uban ang mga opisyal sa Sangguniang Panlungsod, representante sa nagkadaiyang ahensya sa gobyerno, ug mga sektor sa komunidad.
Tumong sa maong festival mao ang pagpasigarbo sa kultura, tradisyon, ug pagtuo sa mga Dapitanon, ilabi na sa espiritwal nga kasaysayan sa Kinabayo Festival.
Si Mayor Uy ,mihatag ug gibug-aton pinaagi sa iyang mensahe nga ang kapiyestahan usa ka padayong paningkamot sa pagpalig-on sa panaghiusa ug identidad sa lungsod.
Sa pikas bahin, si Congressman Pinpin Uy, mihatag usab og mensahe diin iyang gitumbok ang papel sa Kinabayo Festival sa pagdasig sa Kristohanong pagtuo ug pagkahiusa sa katawhan.
Nahimong highlight sa maong seremonya mao ang turnover sa Pepsi products gikan sa Pepsi Philippines, uban sa kooperasyon sa Pungko-pungko Vendors Association, samtang ang Tagum Cooperative, naghatag og libre nga ice cream ug raffle giveaways, nga mipadugang sa kalipay sa mga mitambong, bisan pa sa ulanong panahon.
Gilauman nga magpadayon ang daghang kalihokan sa umaabot nga mga adlaw, nga maglakip sa mga pasundayag, relihiyosong aktibidad, ug cultural shows, isip kabahin sa semana nga selebrasyon sa Kinabayo Festival 2025.(Jumalisa Papa)
Source: Dapitan City Government