Nagtinabangay ang Katipunan Municipal Police Station ug mga Criminology interns sa Jose Rizal Memorial State University (JRMSU)-Katipunan Campus sa pagpahigayon og community awareness program aron mapalig-on ang public safety ug environmental awareness sa Barangay Tuburan.
Gipahigayon ang kalihokan sa Senior Citizen Hall sa maong barangay ubos sa tema nga “Community Engagement for Public Safety and Environmental Sustainability.”
Si PCpl Rey Christian P. Lilic ug Patrolwoman Edeliza L. Dangase-MCAD PNCO, ubos sa pagdumala ni PCPT Jonathan T. Lagang, Officer-in-Charge sa Katipunan MPS, maoy nahimong resource speakers sa programa sa pakigtambayayong sa mga opisyal sa Barangay Tuburan nga gipangulohan ni Barangay Chairperson Niño Darafele D. Necesario.
Kabahin usab sa kalihokan ang paghatag og food packs ngadto sa mga residente isip suporta sa community immersion program nga gipasiugdahan sa JRMSU School of Criminal Justice Education pinaagi sa mga criminology interns ubos sa pagpanguna ni Mrs. Haide G. Vailoces, OJT Coordinator.
Sumala sa mga organizers, tumong sa programa nga mapalig-on ang kooperasyon tali sa kapolisan, barangay, eskwelahan ug komunidad aron mapalambo ang crime prevention, civic responsibility ug pag-atiman sa kalikupan.
Gilauman usab nga pinaagi sa maong immersion activity, mas mapalawom ang kahibalo ug kasinatian sa mga criminology interns sa tinuod nga public service ug community policing.(IKEN B. GULLEM)
Source: Katipunan Municipal Police Station