Giduso sa Sangguniang Panlalawigan sa Zamboanga del Norte ang pagpalig-on sa kampanya batok ilegal nga droga pinaagi sa public hearing alang sa Proposed Provincial Ordinance No. SP 26-02 nga nag-establisar sa “Drug-Free Workplace Policy” sa provincial government.
Ang joint public hearing gipahigayon niadtong Mayo 19, 2026 sa SP Session Hall sa Provincial Legislative Building pinaagi sa Committee on Laws, Rules, Privileges and Style ug Committee on Police, Peace and Order.
Tumong sa maong ordinansa nga mapugngan ang paggamit ug pag-abuso sa ilegal nga droga sulod sa kapitolyo ug masiguro nga limpyo ug responsable ang serbisyo publiko sa probinsya.
Kabahin usab kini sa tinguha ni Governor Darel Dexter T. Uy nga mapadayon ang kampanya aron mahimong “drug-free” ang tibuok Zamboanga del Norte.
Si 2nd District Board Member Atty. Peter Y. Co ang nangulo sa hearing isip presiding officer kauban sila ni BM Chady Yebes, BM Michael Documento ug BM Dario Mandantes.
Mitambong sa kalihokan ang mga representante gikan sa DILG, PDEA, PADAC, BJMP, PNP-ZNPPO, media ug ubang ahensya aron mohatag sa ilang mga suhestiyon ug komento alang sa mas epektibong implementasyon sa ordinansa.
Human sa hearing, ibalik sa komitiba ang gi-proposar nga balaod alang sa dugang pagrepaso ug pag-finalize sa mga probisyon niini.(IKEN B. GULLEM)