Nakabaton na sa legal nga pagpanag-iya sa kampus niini ang Katipunan National High School (KNHS) human mapirmahan ang Memorandum of Agreement ug pormal nga maturn-over ang yuta sa eskwelahan, nga nagtapos sa kapin upat ka dekada nga walay opisyal nga katungod sa luna diin kini nagtindog sukad 1984.
Nahimong posible ang maong kalampusan pinaagi sa hiniusang paningkamot sa administrasyon sa eskwelahan, lokal nga panggamhanan ug mga stakeholder sa komunidad. Dako usab ang nahimo ni School Principal Emerita Abrigana sa pagduso sa proseso aron maseguro ang titulo sa yuta alang sa institusyon.
Gisuportahan ang donasyon ni Mayor Maiko Wong ug giaprobahan sa Sangguniang Bayan sa Katipunan pinaagi sa Deed of Donation, samtang mitabang usab sa legal ug dokumentaryong proseso sila Municipal Assessor Edgar Reganion ug Atty. James Zamora.
Alang sa komunidad sa KNHS, labaw pa sa pagbalhin sa pagpanag-iya sa yuta ang maong kalampusan, kondili usa ka simbolo sa kalig-on ug kasiguruhan sa kaugmaon sa eskwelahan nga nagserbisyo sa mga kabatan-onan sa Katipunan sulod sa kapin 40 ka tuig.(JENIFFER JR. DELICA)
Source: Zamboanga del Norte Provincial News Network