Hemas rehas ang usa ka 54 anyos nga lalaki nga nakumpiskahan sa gidudahang shabu atol sa hiniusang buy-bust operation sa kapolisan didto sa Barangay Libay, Sibutad Zamboanga del Norte niadtong Lunes, Hunyo 8.
Giila sa Sibutad Municipal Police Station (MPS) ang suspetsado nga si alyas “Tadodong”, single, laborer, usa ka elementary level, residente sa nasangpit nga lugar ug bag-ong giilang drug personality sa maong lungsod.
Sumala sa kapolisan, alas 10:15 sa gabii dihang gipahigayon ang buy-bust operation nga gipangulohan sa Sibutad MPS, uban sa mga sakop sa 1st Zamboanga del Norte Provincial Mobile Force Company ug Zamboanga del Norte Police Drug Enforcement Unit.
Narekober gikan sa suspetsado ang tulo ka sachet nga adunay substansiya nga gituohang shabu, lakip ang buy-bust item ug duha ka possession items. Nakumpiskar usab ang 500 peso bill ug 50 peso nga marked money ug uban pang mga ebidensiya nga may kalabutan sa ilegal nga droga. Gibanabana sa kapolisan nga mokabat sa duha ka gramo ang timbang sa nakumpiskar nga gidudang shabu nga adunay kantidad nga P13,600.
Balhog karon ang suspetsado sa kustodiya sa Sibutad MPS ug giatubang ang kasong paglapas sa Republic Act 9165 o Comprehensive Dangerous Drugs Act of 2002. Samtang, ang mga nakumpiskar nga ebidensiya ipadala sa Provincial Forensic Unit alang sa tukmang eksaminasyon ug disposisyon.(IKEN B. GULLEM)