Nagpahigayon ang Lokal nga Panggamhanan sa Katipunan og Case Conference aron masusi pag-ayo ang kahimtang sa mga benepisyaryo sa Pantawid Pamilyang Pilipino Program (4Ps) sa dili pa sila opisyal nga mugradwar sa programa.
Gitambongan ang kalihokan nila Mayor Maiko Wong, Vice Mayor Antonio B. Jumawak, Municipal Agriculturist Homer Joshua Sumbilon, Municipal Social Welfare Officer Emma M. Tagbac, ug mga kawani sa Pantawid Program. Atol sa komperensya, girepaso ang kahimtang sa matag panimalay aron masiguro nga andam na silang magpadayon bisan wala na ang suporta gikan sa programa.
Gipasiugda sa mga partisipante ang kahinungdanon sa hapsay nga koordinasyon ug patas nga ebalwasyon aron matino kung ang mga pamilya adunay igo nga kapasidad ug kahigayonan sa pagbarog sa ilang kaugalingon.
Sumala sa Lokal nga Panggamhanan sa Katipunan, ang maong kalihokan kabahin sa padayon nga paningkamot sa pagpalig-on sa mga pamilyang benepisyaryo pinaagi sa responsableng pagdumala ug pag-andam kanila alang sa mas malungtarong panginabuhi human sa ilang paghuman sa 4Ps.(JENIFFER JR. DELICA)
Source: Pantawid- Katipunan