Gipalig-on sa Katipunan Municipal Police Station (MPS) ang pakiglambigit sa kabatan-onan pinaagi sa pag-apil isip resource speakers sa Katipunan ng Kabataan Assembly nga gipahigayon sa Barangay Tuburan, Katipunan, Zamboanga del Norte.
Gipangunahan ang kalihokan sa mga personahe sa Katipunan MPS ubos sa pagdumala ni Officer in Charge PCPT Jonathan Tapalla Lagang, sa pakigtambayayong sa PNP Drug Enforcement Group, PNP Zamboanga del Norte Forensic Unit, ug mga opisyal sa Sangguniang Kabataan sa Tuburan nga gipangulohan ni SK Chairperson Hon. Wency Jell T. Felizarta.
Tumong niini ang pag-edukar ug paghatag og kahibalo sa mga kabatan-onan bahin sa public safety, crime prevention, responsableng paggamit sa social media, kampanya batok sa ilegal nga droga, ug ang ilang papel sa pagpalambo sa komunidad.
Nahatagan usab og higayon ang mga batan-on sa bukas nga diskusyon aron mapalig-on ang ilang partisipasyon sa pagmintinar sa kalinaw ug kahapsay sa ilang barangay. Sumala sa mga tigpasiugda, ang maong asembliya usa ka importante nga lakang sa paghulma sa responsableng liderato ug aktibong pagkamamamayan taliwala sa kabatan-onan.(IKEN B. GULLEM)
Source: Katipunan Municipal Police Station