Mokabat ngadto sa 3,500 ka mga indibidwal lakip ang mga kabataan ang mihugop sa Gugma Ayuda Ni Nanay Nene Outreach Program sa Tipan Elementary School, Barangay Tipan, lungsod sa Gutalac, Marso 17 niining tuiga.
Dili lamang gikan sa Barangay Tipan ang nakapahimulos sa maong programa kondili lakip na ang kasikbit nga 4 ka barangay nga mao ang Panganuran, Sibalic, Detagan ug Bayanihan.
Gilatas sa mga sakyanan sa Team Ayuda gikan sa highway Gutalac padulong sa Barangay Tipan nga adunay 47 kilometros ang gilay-on aron lamang ipaabot ang mga serbisyo sa gobyerno ngadto sa katawhan sa maong dapit gikan sa kagamhanang probinsyal sa Zamboanga del Norte sa administrasyon ni Governor Rosalina “Nanay Nene” Jalosjos subay sa iyang panultihon, “Misyon ko tinuod nga Serbisyo”.
Si Tipan Barangay Captain Merlyn Elmia ang mipaabot sa iyang dakong pagpasalamat ngadto ni Nanay Nene alang sa mga ayuda ug serbisyo nga gipaabot dili lamang sa iyang barangay kondili lakip na ang laing 4 ka mga silingang barangay niini.
Samtang si Barangay Panganuran Konsehal Dominador Mandag Jr. mipadayag usab sa iyang dako nga pagpasalamat ni Nanay Nene nga bisan sa kalayo sa ilang lugar, wala nagmakuli paghatag serbisyo sa katawhan.
Gi klaro sa maong konsehal nga ang gihatag sa kagamhanang probinsyal nga mga ayuda, dako kaayo ug gikatabang sa matag pamilya ilabina sama nila nga mga Subano.
Nasayran nga adunay 4mil ka mga pack meals, 1,158 ka bags sa tag-5 ka kilong commercial rice ug champorado ang gihatag sa Provincial Social Welfare and Development Office (PSWDO).
Ang Office of the Provincial Agriculturist (OPAG) mihatag sa 500 ka packs nga adunay sulod nga organic/inorganic fertilizer, corn seeds, mga liso sa utanon sama sa pechay, tangkong, baguio beans ug sweet potato.
Adunay 150 ka mga manok ang gihatag sa Provincial Veterenarian Office, purga ug bitamina sa iro, manok ug baka samtang carabao milk ice candy ang gipang-apod alang sa kabataan ug mga indibidwal.
Dili lamang hangtod sa seguridad ug kalamidad ang gihimo sa Provincial Risk Reduction and Management Office (PDRRMO) kondili mihimo usab kini ug pagpangtupi o alot sa katawhan sa maong dapit.
Ang Gugma Ayuda Ni Nanay Nene Outreach Program mitunol usab sa school bags ug school supplies ngadto sa 600 ka magtutungha sa maong dapit.
Misungasong usab sa Tipan, Gutalac ang Kasambahay Inc. nga mihatag sa 20 kabuok 100peso bill sa 20 usab ka indibidwal, 20 ka T-shirts, 20 ka grocery packs ug nagpakaon sa 2 ka tube sa lamian nga ice cream.
Samtang, laing 5 ka tube sa nagkalain-laing flavored sa ice cream ug adunay pan ang gidalit sa ZNPPO alang sa katawhan aron matambalan ang naglagiting kainit sa panahon.
Paghidangat sa Provincial Health Office sa Tipan Elementary School, mipila gilayon ang mga residente ug kabataan aron mopahimulos sa ilang serbisyo. Adunay 742 ang nakapahimulos sa konsulta ug nahatagan sa libre nga tambal ug bitamina.
Adunay 70 ang nagpa-ibot sa ngipon, 79 ang nagpatuli.
Source: PIC Zanorte