Napuno og paglaum ang mga residente sa Barangay Marapong ug kasikbit nga mga barangay human madala ang Kuyog Ta Medical, Dental ug Serbisyo Caravan sa ilang lugar niadtong Hunyo 15, 2026.
Gidala sa Provincial Government of Zamboanga del Norte ubos sa pagpanguna ni Gobernador Darel Dexter Uy ang nagkadaiyang libre nga serbisyo sama sa konsultasyon medikal, tambal ug bitamina, dental services, veterinary assistance, ug social services nga naglangkob usab sa pag-apod-apod sa mga semilya sa tanom ug used-but-not-abused nga mga sinina.
Gipasiugda sa mga opisyal sa probinsya nga ang maong inisyatiba nagduol sa serbisyo sa katawhan ilabina sa mga barangay nga layo sa sentro, aron mamenosan ang gasto ug kalisod sa pag-adto sa mga health facilities.
Gipahigayon usab ang Buntis Congress nga nagtudlo sa husto nga pag-atiman sa mga mabdos ug sa ilang gisabak, kauban ang paghatag og pregnancy kits ug suporta sa nutrisyon.
Ang maong kalihokan nagpakita sa padayon nga paningkamot sa probinsya nga masiguro nga ang serbisyo sa gobyerno maabot gyud sa grassroots level.(IKEN B. GULLEM)
Source: Zamboanga del Norte Provincial News Network