ZAMBOANGA CITY — Gipalig-on sa Department of Agrarian Reform Regional Office IX (DAR-9) ang sistema sa dokumentasyon ug pagproseso sa bayad alang sa mga proyekto nga gipundohan sa Agri-Agra Fund pinaagi sa usa ka cascading workshop nga gipahigayon sa Marcian Garden Hotel.
Gitambongan kini sa mga personnel nga nalambigit sa implementasyon, monitoring, ug dokumentasyon sa mga proyekto aron mas masiguro ang hustong pagsunod sa mga proseso ug mapaspas ang pagproseso sa mga kinahanglanong dokumento ug bayranan. Sentro sa diskusyon ang Memorandum Circular No. 03, Series of 2026 nga naglatid sa mga lakang, timeline, ug reporting mechanisms alang sa maong mga proyekto.
Sumala sa DAR-9, ang workshop kabahin sa padayong paningkamot sa ahensya sa pagpaayo sa project management system ug pagsiguro nga epektibong mahatod ang mga serbisyo ug suporta ngadto sa mga benepisyaryo sa agrarian reform pinaagi sa hapsay nga paggamit sa Agri-Agra Fund.
Gawas sa workshop, gihimo usab ang usa ka sendoff ceremony alang kang Chief Agrarian Reform Program Officer Felicidad “Fely” Cadungog nga bag-ohay lang miretiro human sa kapin 30 ka tuig nga serbisyo sa Land Tenure Improvement Division. Gipasidunggan siya sa iyang mga kauban ug opisyal pinaagi sa mga mensahe, video presentation, ug paghatag og mga token isip pasalamat sa iyang dedikasyon sa ahensya.
Sa iyang mensahe, giawhag ni Cadungog ang mga empleyado nga ipadayon ang mga mithi sa Love of Work, Team Spirit, Integrity, ug Dependability, samtang nagpadayon sa paghatag og labing maayong serbisyo sa publiko ug sa mga benepisyaryo sa programa sa DAR.(JENIFFER JR. DELICA)
Source: DAR Region IX