Mokabat sa 1,000 ka indigenous ug forest tree seedlings ang gitanom sa usa ka 1.2-ektaryang lugar sa Barangay Gabu, Labason isip kabahin sa reforestation drive nga nagtumong sa pagpasig-uli sa kalasangan ug pagpalig-on sa biodiversity sa maong lugar.
Gitambongan ang kalihokan sa 115 ka partisipante gikan sa nagkadaiyang ahensya sa gobyerno, lokal nga panggamhanan, pribadong sektor, ug mga organisasyon sa komunidad nga naghiusa sa paningkamot sa pagpanalipod sa kinaiyahan.
Sa wala pa ang tree planting activity, nagpahigayon og orientation si Froilan S. Villarba sa Municipal Disaster Risk Reduction and Management Office (MDRRMO) kabahin sa katuyoan sa programa ug sa hustong pamaagi sa pagtanom sa mga kahoy.
Lakip sa mga miapil ang mga representante gikan sa Philippine National Police (PNP), Department of Social Welfare and Development (DSWD), Bureau of Fire Protection (BFP), MDRRMO, Zamboanga Nickel Corporation, Kalahi Labason, Local Government Unit sa Labason, Barangay Gabu, Department of Labor and Employment (DOLE)-TUPAD, Municipal Agriculture Office (MAO), Office of the Municipal Mayor, ug Community Environment and Natural Resources Office (CENRO).
Ang mga gitanom naglangkob sa mga lumad ug forest tree species sama sa Pulayo, Palotsina, ug Philippine Acer, nga gilauman makatabang sa pagpasig-uli sa ekosistema ug sa dugayng pagpanalipod sa kalikupan.(IKEN B. GULLEM)
Source: DENR Zamboanga Peninsula